Philippe Desportes

Chanson.

Que je suis redevable aux cieux
De ce qu'ils m'ont ouvert les yeux
Et si bien purgé ma poitrine,
Que rien plus ne me satisfait
Qui ne soit divin et parfait
Et qui n'ait celeste origine.

Tout ce qu'Amour sçauroit trouver
D'attraits pour un coeur captiver.
Tout ce que la beauté peut faire,
Le destin et l'election,
Tout s'assemble en raffection
Qui rend mon esprit tributaire.

La gloire de mon seul penser
Fait que rien ne peut m'offenser,
Rigueur, prison, gesne et martyre;
J'aime mieux un de mes tourmens
Que les plus chers contentemens
Qu'Amour reserve à son empire.

Mes fers me contentent si fort,
Que je ne hay moins que la mort
L'estat que franchise on appelle;
Et si mon coeur trop arresté
Escoute un Inot de liberté,
Je le punis comme rebelle.

Plustost juillet sera glacé,
Et l'hyver de fleurs tapisse;
Plustost sera froide la flame
Que je reçoive une autre loy :
Ce seroit cesser d'estre moy,
Que de cesser d'aimer ma dame.

Si je meurs blessé de ses yeux,
Ma fin me rendra glorieux,
Donnant vie à ma renommée;
Et mourant j'auray le confort
Du soldat, qui reçoit la mort
Par la main du chef de l'armée.