Samuel N. Rosenberg

Chanson d'amour attribuée à Conon de Béthune

Chançon legiere a entendre
Ferai, que bien m'est mestiers
Ke chascuns le puist aprendre
Et c'on le chant volentiers ;
Ne par autres messaigiers
N'iert ja ma dolors mostree
A la millor ki soit nee.

Tant est sa valors doblee
C'orgeus et hardemans fiers
Seroit se ja ma pensee
Li descovroie premiers ;
Mais besoins et desiriers
Et çou c'on ne puet atendre
Fait maint hardement emprendre.

Tant ai celé mon martire
Tos jors a tote la gent
Ke bien le devroie dire
A ma dame solement,
K'Amors ne li dist noient ;
Neporquant s'ele m'oblie,
Ne l'oublïerai je mie.

Por quant, se je n'ai aïe
De li et retenement,
Bien fera et cortoisie
S'aucune pitiés l'em prent.
Au descovrir mon talent
Se gart bien de l'escondire,
S'ele ne me velt ochirre.

Fols sui, ki ne li ai dite
Ma dolors ki est si grans.
Bien deüst estre petite
Par droit, tant sui fins amans ;
Mais je suis si meschaans
Ke quanques drois m'i avance,
Me retaut ma mescheance.

Tous i morrai en soffrance,
Mais sa beautés m'est garans,
De ma dame, et la samblance
Ki tos mes maus fait plaisans,
Si ke je muir tous joians,
Ke tant desir sa merite
Ke ceste mors me delite.

Noblet, je sui fins amans,
Si ai la millor eslite
Dont onques cançons fu dite.